Kigali: Abavuzi 120 b’indwara z’abana barahuguwe

Ishyirahamwe ry’Abaganga rihuriwemo n’Abanyarwanda ndetse n’Abanyakenya bavura indwara z’abana( paediatrics) rimaze guhugura abaganga 120 mu bijyanye n’ubuvuzi bw’abana bwitwa Emergency Triage Assessment and Treatment (ETAT), kuva mu Ukwakira, umwaka ushize wa 2010.

Muri iyi gahunda, ku wa gatanu ni bwo hashojwe icyiciro cya kane kigizwe n’abaganga b’abana 30 bari bamaze iminsi igera kuri 5 bahugurwa. Ayo mahugurwa akaba yarabaye ku bufatanye n’Umushinga w’Ababiligi (Belgian Technical Cooperation-BTC) ndetse n’Ishuri ryo mu Bwongereza “Imperial College UK”.

Paediatricians bivuga abaganga bita ku ndwara z’abana mu byiciro binyuranye: abana bato, abana bari mu kigero kiringaniye n’ingimbi. Aba baganga bakabamo ibice by’abaganga rusange babyigiye n’ab’inzobere muri byo ( general and specialist paediatricians).

Nk’uko tubikesha The New Times, mu kiganiro gito umwe mu bahuguwe ukora mu bitaro bya Muhima, Clarisse Niwenagabiye, yavuze ko amahugurwa azabongerera ubumenyi.

Niwenagabiye ati “Twize uburyo butandukanye bwo kumenya umwana ufite ibimenyetso byerekana ko arembye, ku buryo natwe tumutabara n’ingoga.”

Abaganga b’abana bakaba barasanze bishoboka ko abana bapfira mu bitaro igihe Muganga yaba atabonye ibimenyetso byerekana ko arembye ngo ahabwe ubuvuzi bubangutse.

Mu bandi bitabiriye ayo mahugurwa harimo abaganga b’Ibitaro byitiriwe Umwami Faycal, ibya Kibagabaga n’Ishuri ry’Ibitaro bikuru bya Kaminuza bya Kigali (CHUK).

Uhagarariye ishyirahamwe ry’abaganga b’indwara z’abana muri Kenya Kenya, Jason Kiruja, yavuze ko iriya gahunda iri mu rwego rwo kugabanya imfu z’abana.

Yagize ati: “Rimwe na rimwe abana bapfira mu bitaro mu gihe cy’amasaha 24 ya mbere biturutse ku kuba abaganga bananiwe kumenya uko umwana ameze, nyuma y’akazi kanini baba bakoze.”

The New Times

Related Posts by Categories