Biturutse ku bushake bw’Ikigo cy’Abanyamerika gikora ubushakashatsi kuri kanseri, Institut National Américain du cancer, itsinda ry’abashakashatsi, bifashishije ibyuma byabugenewe basanze bishoboka kugabanya imfu zihitana hakiri kare abanywa itabi n’abigeze kurinywa ku kigero cya 20%. Kanseri ziturutse ku kunywa itabi zikunze gufata imyanya y’ubuhumekero-mbere bikaba bitari byoroshye kugaragaza ibimenyetso ku murwayi.
Nk’uko biherutse gutangazwa n’ikigo cyo mu Bufaransa Institut de Veille Sanitaire (InVS), kanseri y’ibihaha iri ku mwanya wa kabiri mu zitwara amagara y’abantu, uyu mwaka impfu zayo zikaba zigera ku 27.500.Nk’uko kiriya kigo cyabitangaje, ngo mu gihe kanseri y’ibihaha igenda igabanuka ku bagabo, mu bagore igenda yiyongera, ku buryo habonetse abantu b’igitsina gore bagera ku 12.000 , bikaba ari 20% ugereranyije n’umwaka ushize wa 2010, naho impfu zikaba zariyongereyeho izigera ku 8.100 muri 2011, bingana na 5%; bikaba biteye inkeke nk’uko byavuzwe n’abakoze ubushakashatsi.
Cyakora ngo nubwo izi kanseri zibasira imyanya y’ubuhumekero zikomeje kugaragara cyane hirya no hino ku isi, bitewe n’ubwiyongere bukabije bw’umubare w’abanywa itabi, ngo haracyashakishwa uburyo bushya mu buvuzi bujyanye n’igihe mu gusuzuma no kuvura izi kanseri, nyuma y’ubwari busanzwe nko kuvoma amaraso ava mu nzira z’ubuhumekero .Ibi ngo bikaba bizatanga icyizere gihamye cy’amahirwe yo gukomeza kubaho ku babana n’ubwandu bw’izi kanseri.
Mu biranga iyi kanseri ituruka ahanini ku kunywa itabi, hari ugukorora no gucira amaraso aturutse mu myanya y’ubuhumekero, bita mu rurimi rw’igifaransa hémoptysies (crachements de sang provenant des voies respiratoires), ububabare bw’imbere mu gatuza (douleurs thoraciques). Gusa ngo ibimenyetso nk’igituntu, gutakaza ibiro n’ibibazo byo kudahumeka neza, ntibigaragaza cyangwa ngo byemeze ko umuntu yaba arwaye iyi kanseri. Na none kandi ngo iyo ubwandu bwamaze gusakara mu bwonko, mu magufa, mu mwijima no mu miyoboro ivana inkari mu mpyiko (glandes surrénales), ngo amahirwe yo kuvurwa umuntu agakira akaba yakomeza kubaho, aba ari make cyane.
Kugeza uyu munsi, nyuma y’imyaka icumi ishize, ibikoresho kabuhariwe mu buvuzi nka scanner (spiralé à faible dose) cyaje gikora ibyisumbuye ku byo icyari kimenyerewe mu buvuzi nka radiographie kiboneka ku bitaro bikuru byinshi kitashoboraga gukora, nko gutanga amafoto y’umwimerere cyangwa agaragaza neza inyama z’imbere mu bihaha.
Nk’uko abigaragaza ku rubuga rwe rwa interinete, mu bushakashatsi yakoze, Pr Antoine Flahault, umuyobozi w’Ikigo cy’Ishuri Rikuru ryigisha ibijyanye n’ubuzima rusange mu Bufaransa, ngo asanga ubuvuzi bw’iyi kanseri hifashishijwe icyuma kabuhariwde cya scanner, ari bwo buhamye kandi bwishimirwa na benshi kurusha Radiographie yari imenyerewe.
Ku bw’aba bashakashatsi, ngo nta mpungenge umuntu yagakwiye kugira yo kwivuza iyi kanseri iterwa no kunywa itabi, kuko ubu buvuzi buboneka henshi ku isi ndetse no mu bitaro byitiriwe umwami Fayisari (King Faycal Hospital) bibarizwa i Kigali, iki gikoresho kikaba gihari.
Ikindi ni byiza ko aho kwikururira iyi ndwara itoroshye na gato, itabi byaba byiza umuntu ariretse, kuko ari byiza kwirinda kuruta kwivuza.
0 comments:
Post a Comment