Icyayi (izina ry’ubumenyi mu kilatini: Camellia sinensis) ni ikimera kivamo ikinyobwa gikungahaye ku ntungamubiri z’umwimerere, zifashishwa mu buvuzi no kurinda indwara zirimo na cancer, kubera ko ari nk’umuti wifitemo ibihumuza by’umwimerere. Icyayi kandi ngo gitera umubiri imbaraga ndetse hari n’ibindi byinshi cyungura ubuzima nko gutuza no kuruhuka.
Nk’uko tubikesha urubuga flair.be, ngo icyayi ni ikinyobwa kitagira calories ku buryo umuntu agifashe nta sukari cyangwa amata ashyizemo, gishobora kwigenzurira ubushyuhe bw’umubiri. Icyayi ngo kiganjemo umunyungugu wa fluor ukomeza uruhu rw’amenyo ruzwi ku izina rya émail. Fluor ngo yirukana kandi ikarinda émail udukoko dutera indwara z’amenyo.Nk’uko uru rubuga rukomeza rubitangaza, ngo ubushakashatsi bwakozwe buvuga ko kunywa icyayi cy’icyatsi (thé vert/green tea) cyangwa icyayi cy’umukara (thé noir/black tea) ngo bigabanya ingaruka zo kurwara cancer y’uruhu, iy’ibihaha n’iy’igice cy’urura runini cyitwa côlon.
Cyakora ngo hari abatekereza ko bimwe mu bigize icyayi cy’umukara bifite oxyde idahagije, ibuza kwirema k’utunyangingo twa cancer mu mubiri w’umuntu. Nyamara ngo gahunda z’ubushakashatsi butandukanye bwakozwe zihamya ko icyayi gifasha mu kurinda indwara z’umutima ndetse n’utubuye twitwa caillot twirema mu maraso.
Ikindi ngo ni uko théine/theine iba mu cyayi igira uruhare mu koroshya uduhu tw’imiyoboro y’amaraso bikayirinda gukomera. Naho polyphénols iba mu cyayi yo, ngo igira uruhare mu kubuza cholestérol kwinjira no kwirema mu maraso kwa twa tubuye twavuzwe haruguru twitwa ‘caillot’.
Théine yo mu cyayi kandi ngo yongerera umuntu ubushobozi bwo kwita no gukomera ku cyo arimo gukora (concentration) biturutse ku byiyumviro by’impumuro n’uburyohe bwayo.
Théine kandi ngo igira uruhare mu kuvubura amatembabuzi yifashishwa mu igogorwa ry’ibiryo, mu mikorere y’impyiko n’umwijima ndetse no mu isohorwa ry’utunyangingo tudakenewe mu mubiri w’umuntu.
0 comments:
Post a Comment